నా పుస్తకావిష్కరణ - కాంప్రెహెన్సివ్ ట్రీటైజ్ ఆన్ పతంజలి యోగ సూత్రాస్ - ఆర్గాన్ డొనేషన్ - దసరా శుభాకాంక్షలు

పుస్తకావిష్కరణ 

 

2016, సెప్టెంబర్, 29 వ తేదీ, ప్రజాశక్తి దిన పత్రిక వారు పుంగనూరు (చిత్తూర్ జిల్లా) లో, తమ 36 వ వార్షికోత్సవం బసవరాజా గవర్నమెంట్ హై స్కూల్ లో జరిపారు. ఆ  సందర్భంగా  నన్ను పిలవడం, నా పుస్తకాన్ని (కాంప్రెహెన్సివ్ ట్రీటైజ్ ఆన్  పతంజలి  యోగ సూత్రాస్), స్థానిక మునిసిపల్ కమీషనర్ , శ్రీ లోకేశ్వర్ వర్మ గారి చేత, పలువురు స్థానిక ప్రముఖుల సమక్షంలో ఆవిష్కరింప జేయడం జరిగింది. 

 ఆంగ్లం లో రాయ బడిన 760 పేజీలున్న పుస్తకం యిది. పెద్దదే. అందుకే యిది కాంప్రెహెన్సివ్ ట్రీటైజ్ అన్నాను. ఈ పుస్తకాన్ని యిది వరకే అన్ని పెద్ద లైబ్రరీ లకు , యోగా ప్రముఖులకు పంపించడం జరిగింది. వారిలో చాలా మంది యోగా ప్రముఖులు స్వయంగా నాకు టెలిఫోన్ చేసి నా పుస్తకాన్ని ఎన్నో విధాలుగా ప్రశంసించడం జరిగింది.  అలాగే, చాలా మంది  లిఖిత  పూర్వకంగా కూడా ప్రశంసించడం జరిగింది. ముఖ్యంగా , రామకృష్ణ  మిషన్ స్వామీజీలు భారత దేశపు పలు మిషన్లనుండి ఈ పుస్తకాన్ని రక రకాలుగా ప్రశంసించారు. వారందరికీ నా కృతజ్ఞతా పూర్వక పాదాభివందనాలు. 

ఈ  పుస్తకం లో ఎన్నో ప్రత్యేకతలు వున్నాయి. పతంజలి మహర్షి రాసిన అన్ని సూత్రాలను, వాటికి ప్రతిపదార్థము, సంక్షిప్త అర్థము , సమగ్ర వివరణ, ఉదాహరణలు , భగవద్ గీత , ఉపనిషత్తులు దీన్ని గురించి ఏం చెప్పాయి , వాటికి వివరణ , ప్రాక్టికల్ ఎక్సరసైజ్స్ , యిలా యిన్నో వివరణలు యిందులో సమగ్రంగా రాయ బడింది. 

చివర 4 అనుబంధాలు (Annexures); అందులో, ఒక సాధకుడు  ఏం   చెయ్యాలి, ఎలా చెయ్యాలి , అతని దైనిక యోగా కార్య క్రమం ఎలా వుండాలి అన్నవంతా సమగ్రంగా యివ్వబడింది. 

భారత దేశపు పలు ప్రాంతాల నుండి, ఎంతో మంది  ఈ పుస్తకాన్ని తమ స్థానిక లైబ్రరీ లలో చదివి నాకు ఫోన్ మూలకంగా తమ అభినందనలు తెలియ జేస్తున్నారు. కాపీలు కొనడానికి ఉత్సాహంగా వున్నారు.

యిప్పుడు నా ఈ పుస్తకం, నేను చదివిన స్కూల్ లో ,  నేను చదివిన క్లాస్ రూమ్ (పెద్ద హాల్) లో, నేను ప్రప్రథమంగా యోగా నేర్చుకున్న హాల్ లో, మా వూరి  స్థానిక ప్రముఖుల ముందు ఆవిష్కరింప బడడం చాలా ఆనందం గా  వుండింది . 

 నేను ఈ పుస్తకాన్ని అంతర్జాతీయంగా అమెజాన్ లాంటి కంపెనీల మూలంగా విక్రయానికి సన్నద్ధం చేయాలని ప్రయత్నం చేస్తున్నాను. త్వరలోనే సఫలం అవుతుందని ఆశిస్తున్నాను. అందుకే దేశీయ సంస్థల వారికి  యివ్వ లేదు. 

మా కుటుంబం లో - అంటే ఉప్పలధడియం వంశంలో , మరో యిద్దరు తెలుగు రచయితలూ  వున్నారు. 

మా చిన్నాన్న , ఉప్పలదడియం రామమూర్తి , వయసు 76 ఏళ్ళు , ఆయన గత 8 ఏళ్లలో మూడు మంచి పుస్తకాలు రాశారు. 

అవి - మహా భారత  నామ కోశము , భాగవత నామకోశము, రామాయణ నామ కోశము. సంస్కృత గ్రంధాల లోని అన్ని పాత్రల వివరణ ఈ తెలుగు పుస్తకాలలో ఆయన చాలా బాగా యిచ్చారు. యివి మూడూ మూడు రీసెర్చ్ గ్రంధాలే. అలాగే , రీసెర్చ్ కు ఉపయోగ పడే గ్రంధాలే. యింకా, యింకా, ఆయన ఇటువంటి ఉత్తమ గ్రంధాలు  రాయాలని కోరుకుంటున్నాము. 

ఆయన పెద్ద కొడుకు, డాక్టర్ వెంకటేశ్వర తెలుగులో ఎన్నో పుస్తకాలు ప్రచురించారు. కవితలు , పద్యాలు, వ్యాసాలు, కథలు లాంటి అన్ని రకాల తెలుగు సాహిత్య రీతులను ఒక పట్టు పట్టి చూస్తున్నారు. అనేక సత్కారాలనూ అందుకున్నారు. యింకా, యింకా రాస్తూనే వున్నారు.  చాలా  మంచి  రచయిత , వుజ్వల భవిష్యత్తు వున్న వాడు. 

మా అన్న వుప్పలధడియం  నాగరాజ పుస్తకాలు రాయలేదు కానీ అద్వైత సిద్దాంతంలో ఎంతో జ్ఞాని అని చెప్ప వచ్చు. స్వామి దయానంద గారి గొప్ప శిష్యుడైన స్వామి పరమార్థానంద గారి వద్ద ఒక దశాబ్దం పైగా శ్రవణము, మననము, నిదిధ్యాసనము చేసినవాడు. మా 6 మంది అన్నదమ్ములు, ముగ్గురు చెల్లెళ్లను  ఒక తండ్రిగా ముందుకు  తీసుకు వచ్చిన వాడు. 

మా నలుగురు చేసిన, సాధించిన  పై విషయాలను గురుతుంచుకుని, ఒక "ఉప్పలధడియం  సాధకుల సభ"  మా అన్న గారింట్లో, ఈ నెల 2 వ తేదీ నాడు  జరిగింది. మా బంధువర్గమంతా ఒక చోట చేరడం, మా సాధనలను సమీక్షించడం , సత్కరించడం  జరిగింది. మాకు యిది చాలా ఆనంద దాయకమైన విషయం. 

యిది ఆ సందర్భంగా తీసిన ఫోటో. యిందులోని ప్రతి ఒక్కరికీ ఏదో ఒక ప్రత్యేకత, సృజనాత్మకత ఉండనే వుంది. ఈ సభలో  ఆర్గాన్ డొనేషన్ అన్న అంశం పైన కూడా చిన్న చర్చ జరిగింది. అందరూ కలిసి , ఆర్గాన్ డొనేషన్  కు సరైన సంస్థలకు, లిఖిత పూర్వకంగా అథారిటీ లెటర్లు  ఓకే సారి యివ్వాలని  ఒక నిర్ణయం కూడా తీసుకున్నాము.  ఇదొక మంచి నిర్ణయం. ఇది ప్రతి కుటుంబం లోనూ, చెయ్య గలిగితే  బాగుంటుంది. నా వుద్దేశంతో , యిది ఒక జాతీయ  వుద్యమం లాగా జరుప గలిగితే చాలా బాగుంటుంది. 

యిలా, జీవితం లో ఎన్నో జరుగుతూ వుంది . మలుపులూ, మార్సులూ , పురోగతి , కొంత తిరోగతి ఉంటూనే వున్నాయి. యిప్పుడు దసరా కదా.  మాయింట్లోనూ బొమ్మల కొలువు పెట్టాము. ఇదో చూడండి. 

  

పాఠకులందరికీ నా (మా) దసరా శుభాకాంక్షలు.

 సర్వే జనాః సుఖినో భవంతు 

= మీ 

ఉప్పలధడియం  విజయామోహన్