నిత్య జీవితం లో యోగా

నిత్య  జీవితం లో యోగా 
 ఒక  విశేష యోగా ప్రక్రియ 

చిన్నపిల్లల నుండి పెద్దవాళ్లవరకు మనం అందరూ నిత్యజీవితంలో యోగ ప్రక్రియలు ఎన్నో వాడుతూ వున్నాము. 

ఉదాహరణకు -

గోపీ 10 వ తరగతి విద్యార్థి. బాగా చదువుతాడు. గోపీ సెక్షన్ లో, 30  మంది విద్యార్థులున్నారు. గోపీకి  రాము బెస్ట్ ఫ్రెండ్. చదువులోనూ, ఆటలలోనూ, మాటల లోనూ, అన్నింట్లో గోపీ, రామూతో బాటే వుండాలని ఇష్టపడతాడు. తెల్లవారి లేస్తే గోపీకి మొదట జ్ఞాపకం వచ్చేది రామూ. 

యిప్పుడు ఈ బెస్ట్ ఫ్రెండ్షిప్ ను దాటి కాస్త ముందుకు వెడదాం. 

ఒకవేళ, గోపీకి, రామూ మాత్రమే కాక , తన క్లాసులోని వారందరూ బెస్ట్ ఫ్రెండ్స్ గా అయ్యారనుకొండి . ఒక్కో సారి అలా జరుగుతుంది . గోపీని వాళ్ళ  మేష్టారు క్లాస్ లీడరుగా పెట్టారనుకొండి.  అందరు  విద్యార్థులను సమానంగా చూడవలసిన అవసరాలు వస్తుంటాయి. అప్పుడు అందరూ బెస్ట్ ఫ్రెండ్స్ అవ్వచ్చు కూడా . 

అప్పుడు గోపీ మనస్థితి ఎలావుంటుంది ? 
అప్పుడు తెల్లవారి లేస్తే గోపీకి ఎవరు జ్ఞాపకం వస్తారు ?
30 మంది పేర్లు చెప్పు కోకున్నా , గోపీ, నా ఫ్రెండ్స్ అందరూ  సుఖంగా వుండాలనుకుంటాడా? 
నా  ఫ్రెండ్స్ అందరూ ఆరోగ్యంగా, రోగాలు లేకుండా - అందరూ క్లాస్ కు రావాలని అనుకుంటాడా?
నా ఫ్రెండ్స్ అందరూ ఏ ఆపదలూ  లేకుండా  భద్రంగా ఉండాలనుకుంటాడా?
నా ఫ్రెండ్స్ అందరూ ఏ శోకాలూ , దుఃఖాలూ లేకండా  వుండాలనుకుంటాడా ?
యిలా గోపీ కాస్త స్ట్రాంగ్ గా మనస్సులో అనుకుంటే , గోపీ యోగా లో ప్రవేశించినట్టే. 

యిదే, గోపీ సంస్కృతం లో చెప్పాలనుకుంటే ఈ శ్లోకం చెబుతాడు :
సర్వే  భవంతు సుఖినః  (లేదా సర్వే  మిత్రాహ్ సుఖినో భవంతు )
సర్వే  సంతు నిరామయాహ్ 
 సర్వే భద్రాణి పశ్యంతు 
మా కశ్చిత్  దుఃఖ భాగ్ భవేత్ 

యిది దేవుడికి  చేసే  ప్రార్థన కాదు . గోపీ మనసులో రేగిన బలమైన, నిస్స్వార్ధమైన కోరిక
యిలా హృదయపూర్వకంగా అనుకున్నప్పుడు గోపీ కొంత యోగిగా మారిపోతాడు.   అందరికీ లీడరు గదా  మరి . 
మానసికంగా అందరూ నాలో వున్నారు , అందరి శ్రేయస్సూ నేను కోరుకుంటున్నాను - అనే భావనే యోగా లో ఒక ముఖ్యమైన  భావన. 
యిప్పుడు ఒక  గొప్ప అద్భుతం జరుగుతుంది . 
గోపీ మనసులోని ఈ బలమైన, నిస్స్వార్ధమైన కోరికను చుట్టూ వున్న ప్రకృతి  కూడా వింటుంది .
మనసులో అనుకున్నాసరే. 
ప్రకృతి ఈ నిస్స్వార్ధమైన, న్యాయమైన కోరికను తప్పకుండా వింటుంది. ప్రకృతికి ఆ శక్తి  ఉంది. ప్రకృతికి అనేక రకాల శక్తులున్నాయి 
సరే . ఎంతైనా కొంత, ఈ గోపీ కోరికను నిజం చేద్దామని ప్రయత్నం చేస్తుంది. 
దీన్ని యిప్పుడు పాశ్చాత్య దేశాల్లో   లా ఆఫ్ అట్రాక్షన్ అని పేరు పెట్టుకున్నారు.
యిప్పుడు యితని బలమైన కోరికకు ప్రకృతి బలం కూడా కొంత తోడవుతుంది . 
ప్రకృతి  ఇతన్ని చూసి 'శభాష్ ' అంటుంది . తన చెయ్యి చాస్తుంది , యితని చేతిలో చెయ్యి కలపడానికి . 

యిది మనకు అనుభవం కావాలి . ప్రకృతి తో చెయ్యి కలపడం మనకు రకరకాలుగా అనుభవం కావచ్చు . 

దీనిపై - ఇప్పుడొక ఎక్స్పరిమెంట్ చెయ్యొచ్చు . 

సర్వే భవంతు సుఖినః - అందరూ సుఖంగా ఉండాలి - అని కళ్ళు మూసుకుని హృదయపూర్వకంగా  ఒక్కసారి అనండి . అన్నారా ?

యిప్పుడు కళ్ళు మూసుకునే ,మీ చెయ్య చాచండి . మీ ముందు విశ్వమంతా వ్యాపించి యున్న ప్రకృతి మాత
అతి సుందరంగా చిరునవ్వు నవ్వుతూ నిలబడి ఉంది. మీ చెయ్యి వైపు తన చెయ్యి చాచింది. మీ చేతిని అందుకుంది - ఒక తల్లి తన బిడ్డ చేతిని పట్టుకున్నట్టు . ప్రకృతి మాత అదృశ్య హస్తం మీచేతిని తాకుతున్న అనుభూతిని మీరు పొందాలి. 

యిది ఒక గొప్ప అనుభూతి . యిది మీరు పొందే వరకు మీరు ఈ ఎక్సపెరిమెంట్  చెయ్యొచ్చు . 

మరొక సింపుల్ ఎక్స్పరిమెంట్ చేద్దాం. 

మీచుట్టూ వున్న ప్రకృతి లో మహా గొప్ప చైతన్యము ఉంది . మీకున్న పంచేంద్రియాల శక్తి కంటే ఎన్నో కోట్ల రేట్లు అధికమైన శక్తి ఆమెకు ఉంది . 

మీరు ఎక్కడ వున్నా ఆమె మీ చుట్టూ వుంది. మిమ్మల్ని చూస్తూనే వుంది. 

మీరు మీ స్వార్థాని  కోసం ఏ  పని చేసినా దానితో ఆమెకు సంబంధం లేదు. 

కానీ, మీరు సర్వే జనః సుఖినో భవంతు అన్నప్పుడు, దాని కోసం పనిచేసినప్పుడు - ఆమె శభాష్ అంటుంది . మీతో చేతులు కలుపుతాను- అంటుంది. ఆ అనుభూతిని మీరు పొందాలి . 

ప్రయత్నించండి. ప్రకృతిమాత మా చుట్టూ వున్న అనుభూతిని మీరు పొందండి. 
 
 ఒంటి చేత్తో చప్పట్లు కొట్టగలరా? కొట్ట లేరు . కానీ ప్రకృతి తో కలిసి కొట్టగలరా ? కొట్ట గలరు.  ప్రయత్నించి  చూడండి . ఒక వైపు మీ చేయి. మరో వైపు ప్రకృతి తన చేయి కలపడం . ఆ అనుభూతి వచ్చే వరకు చెయ్యండి . 

యిలా చేస్తూ ఉంటే - మీరు చేసే ప్రతి పనిలోనూ ప్రకృతి శక్తి కూడా మీకు తోడవుతుంది 

=సర్వే  జనాః  సుఖినో భవంతు 

మీ 

 విజయమోహన్ 
 
 

సమాజంలో సమస్యలు - వాటి మూల కారణం

కమ్యూనికేషన్ స్కిల్స్ 

పరస్పర అవగాహనా నైపుణ్యం 

మాట్లాడ వలసిన వాడు -  మాట్లాడ వలసిన సమయంలో, మాట్లాడ వలసిన స్థలం లో, మాట్లాడ వలసిన వారితో మాట్లాడ వలసిన విధంగా మాట్లాడాలి. అలా మాట్లాడక పోతే చిక్కులు, ప్రమాదాలు వచ్చి పడతాయి.

మరి, అలా మాట్లాడితే - వున్న మరియు రాబోయే చిక్కులు, ప్రమాదాలు కూడా తొలగిపోయే అవకాశం ఉంది. అలా మాట్లాడ గలిగి, మాట్లాడే వాడు బుద్ధిమంతుడు, జ్ఞాని. సమయస్ఫూర్తి గలవాడు. ప్రతి మనిషికీ, ప్రతి సమాజానికీ అటువంటి మనుషులు కావాలి .

కానీ, మాట్లాడ కూడని  వాడు -  మాట్లాడ కూడని  సమయంలో, మాట్లాడ కూడని స్థలం లో, మాట్లాడ కూడని వారితో, మాట్లాడ కూడని విధంగా మాట్లాడితే  చిక్కులు, ప్రమాదాలు వచ్చి పడతాయి. వున్నవి జటిలమవుతాయి. అటువంటి వాడు వాచాలుడు, మూర్ఖుడు. వాడి నోరు ముయ్యక పోతే, అన్నీ ప్రమాదాలే . తనకే కాదు, చుట్టూ వున్న వారికీ ప్రమాదాలు తెచ్చి పెడతాడు. 

అయితే, వినవలసిన  వాడు -  విన వలసిన సమయంలో,  విన వలసిన స్థలం లో,  విన వలసిన వారి మాటలను విన వలసిన విధంగా తప్పక వినాలి;అర్థం చేసుకోవాలి; పాటించాలి.

వినవలసిన వాడు -  అలా  వినక పోతే, పాటించక పోతే చిక్కులు, ప్రమాదాలు వచ్చి పడతాయి. వున్నవి జటిలమవుతాయి. వింటే , పాటిస్తే , వున్న చిక్కులు , ప్రమాదాలు మాయమవుతాయి. క్రొత్తవి రాకుండా వుంటాయి. 

అలాగే, విన కూడని  వాడు -   విన కూడని  సమయంలో,  విన కూడని  స్థలం లో,  విన కూడని  వారి మాటలను విన కూడని  విధంగా వింటే కూడా ఎన్నో చిక్కులు, ప్రమాదాలు వచ్చి పడతాయి. వున్నవి జటిలమవుతాయి. అలా వినే వాడు మూర్ఖుడు.

 సరైన విధంగా మాట్లాడడమూ , వినడమూ, మన జీవితానికి కావలసిన అతి ముఖ్యమైన ప్రాథమిక విద్యలు, కళలు, విజ్ఞానమూ కూడా .

మంచి వాడితో, జ్ఞానితో, సమయ స్ఫూర్తి వున్న వాడితో   మాట్లాడమన్నారు; వాడి మాట వినమన్నారు; వాడి స్నేహం కట్టమన్నారు, మన పెద్దలు. అదే ముక్తికి కూడా సులభమార్గమన్నారు. సత్సంగత్వే ..... జీవన్ముక్తిహి - అన్నారు ఆది శంకరాచార్యులు.

భార్యాభర్తలు ఒకరితో ఒకరు  యెలా వుండాలి - అన్న విషయం కూడా ఇందులో మనం తెలుసుకో వచ్చు . తల్లిదండ్రులు పిల్లలు మధ్య సంబంధాలు ఎలా వుండాలి - అన్న విషయం కూడా ఇందులో మనం చూడ వచ్చు. స్నేహ, బాంధవ్యాలకు ముఖ్యంగా  ఈ సూత్రాలు పునాది .

సమయస్ఫూర్తి తో   మాట్లాడగలగడం,వినగలగడం , మంచి గ్రహించగలగడం, చెడు విడిచిపెట్ట గలగడం ఇవీ జీవితంలో విజయానికి పునాదులు. ఆనందానికి సోపానాలు.

ఇవి విద్యలో  మొదటి పాఠాలు గా ఉండవలసినవి. కడపటి పాఠాలు గా కూడా నేర్పడం లేదు.

అందుకే సమాజంలో యిన్ని సమస్యలు.

సర్వే జనాః సుఖినో భవంతు 

-మీ 

ఉప్పలాధడియం విజయమోహన్

 


 

కామ్ప్రెహెన్సివ్ ట్రీ టైజ్ ఆన్ పతంజలి యోగ సూత్రాస్- నా ఆంగ్ల పుస్తకానికి - రామకృష్ణ మిషన్ స్వామీజీ ల ఆశీస్సులు , ప్రోత్సాహాలు

కామ్ప్రెహెన్సివ్  ట్రీ టైజ్  

ఆన్ పతంజలి  యోగ సూత్రాస్

వొక్క సంవత్సరంగ దీర్ఘదర్శి  తెలుగు బ్లాగ్  మౌనం గా వుండవలసి వచ్చింది . అందుకు కారణం యిదో - నేను రాసిన ఈ ఆంగ్ల పుస్తకం :

ఈ పుస్తకం రాయడానికి నాకు 2-3 సంవత్సరాల పైనే పట్టింది . 740 పేజీలు  A 4 సైజ్  పుస్తకం యిది . అంతా పతంజలి రాసిన యోగ సూత్రాల  గురించే . నాకు తెలిసినంత వరకు ,యోగ సూత్రాల గురించి యింత వివరణగా ,సిద్ధాంత పరంగానూ, ఆచరణ పరంగానూ  చెప్పిన పుస్తకం మరొక్కటి  లేదు . 

వీటిని - యోగ నిష్ణాతులైన రామకృష్ణ మిషన్ స్వామీజీ లకు, మిగత యోగా గురువులకు , లైబ్రరీ లకు యూనివర్సిటీ లకు పంపించడం జరిగింది. చాలా మంది  రామకృష్ణ మిషన్ స్వామీజీలు తమ ఆశీస్సులు , తమ హర్షం , తమ ప్రోత్సాహాలను చాలా బాగా వ్యక్తీకరించారు (లెటర్ల ద్వారా, ఫోన్ కాల్ ద్వారా , ఈ మెయిల్  ద్వారా నాకు ఎంతో ప్రోత్సాహం  యిచ్చారు. అలాగే ద్రావిడియన్  యూనివర్సిటీ  వైస్  చాన్సెలర్ గారు కూడా ఫోన్లో తమ ప్రోత్సాహం  వ్యక్తీకరించారు. ఇంకా , ప్రతి రోజూ, ఈ ప్రోత్సాహ వాహిని సాగుతూనే వుంది యిప్పటి వరకూ . 

ఒక స్వామీజీ, యిది మీ జీవితాన్నే ధన్యం చేసే  రచన అన్నారు .

పూరీ రామకృష్ణ మిషన్ స్వామీజీ గారు, స్వామీ  పరిశుద్ధానంద యిలా అన్నారు :

"ఈ పుస్తకం అత్యున్నతమైన   సెల్ఫ్ హెల్ప్ పుస్తకం  అనటం లో సందేహం లేదు . 

"ఈ అద్భుతమైన  వివరణాత్మక పుస్తకం లో యోగా ను గురించి మీ రెంత  అధ్యయనం  చేసారో బాగా తెలుస్తూ వుంది ... యిది యోగా ను దేశ  విదేశాల్లో వ్యాపింపజేయడానికి ,చాలా బాగా ఉపయోగ పడగలదు . అందులోనూ , మన ప్రధాన మంత్రి గారు  పోయిన సంవత్సరం లో అంతర్జాతీయ  యోగా దినోత్సవం ఆరంభించిన  నేపథ్యంలో , దీని ఉపయోగం చాలా వుంది 

. 

"యింత అత్యంత ఉపయోగకరమైన  పుస్తకం మానవాళి కి అందించడానికి మీరు పడ్డ శ్రమకు మా హృదయపూర్వక సంతోషాన్ని వెలి బుచ్చుతున్నాము . 

"రామకృష్ణ దేవుడి ఆశీస్సులు మీకు ఎల్లప్పుడు వుండుగాక ...... "

యిది స్వామీజీ గారు వ్రాతపూర్వకంగా  అంగ్లంలో రాసి పంపారు . దాదాపు యిలాగే మదురై , బెంగుళూరు స్వామీజీలు ఫోన్ చేసి నాతో    మాట్లాడి  ఎంతో ప్రోత్సహించారు . అలాగే ద్రావిడియన్  యూనివర్సిటీ  వైస్  ఛాన్సలర్  గారు కూడా ఫోన్ చేసి చాలా బాగా అభినందించారు; ప్రోత్సహించారు. 

నా వరకు నాకు - నా శ్రమ, ఈ అభినందనల పరంపర అన్నీ ఈశ్వరార్పణం. శివునాజ్ఞ  లేనిది చీమైనా కదలదు  . ఆయన ఆజ్ఞ అయితే ఏదైనా జరుగుతుంది . అంతే .

అయితే , మానవ ప్రయత్నం  లేనిదే  దైవ సాహాయ్యం  వుండదు కదా . మన ప్రయత్నం వుండాలి . నేను యిది పూర్తిగా నమ్ముతాను .  

ఈ పుస్తకం యింకా కొంత మంది మహానుభావుల ఆశీస్సుల కోసం ఎదురు చూస్తోంది . ఆ తరువాత నే , మార్కెట్ లో విక్రయాలు, యివన్నీ .

ఈ పుస్తకం  లో -వొక్కొక్క యోగ సూత్రానికీ  పూర్తి వివరణ యివ్వడమే కాకుండా, ఆ సూత్రప్రకారం  సాధకుడు ఆచరించవలసిన , పాటించ వలసిన ఎక్సర్సైజ్ లు కూడా యివ్వడం జరిగింది . అంటే - సూత్రం చదివిన వెంటనే  - ఆచరణలో కూడా పెట్టె య్యడమే, తద్వారా , దాని పూర్తి  ఫలితాన్ని పొందడమే పుస్తకం వుద్దేశ్యం .   చాలా సూత్రాలకు యిలా యివ్వడం జరిగింది .

ప్రతి దినం వొక యోగ సాధకుడుగా మీరు ఆచరించ దాగిన దైనిక చర్య కూడా సులభంగా, ఆచరణ యోగ్యంగా , మీ టైం  ప్రకారం  చెయ్య దగినట్టుగా, యివ్వడం జరిగింది . అయినా పతంజలి ఆదేశించిన నియమాలన్నీ పాటించ డమూ  జరిగింది . కొండల్లో, కోనల్లో, గుహలలో, అరణ్యాలలో  మాత్రమే కాదు , ఇళ్ళల్లో కూడా యోగా పూర్తిగా  ఎలా సాధించ  వచ్చో చెప్పడం జరిగింది .

పతంజలి మహర్షి చెప్పింది మాత్రమే  కాక , శ్రీకృష్ణ భగవానుడు, ఉపనిషత్తులు, శంకరాచార్యులు - యోగాచరణ గురించి చెప్పినవి కూడా  యిందులో  విశదంగా పొందు పరచడం  జరిగింది .

అష్టాంగ  యోగా కొరకు - మీరు ఈ పుస్తకం దాటి పోననవసరం లేకుండా వుండటమే నా వుద్దేశ్యం . సిద్ధాంత పరం గానూ , ఆచరణ పరంగానూ , ఈ పుస్తకం చాలు - అన్నంతగా వుంటుంది . అంటే , గురువు  వద్దని చెప్పటం లేదు . కొంత  గురు ముఖంగా నేర్చుకుంటే మేలు . కానీ, మీ వూళ్ళో, మీ దగ్గర్లో  ఎక్కడా , గురువే లేకుంటే ? యోగా మర్చిపోవాలా ? అక్కర్లే దు . అప్పుడూ యోగా చెయ్యొచ్చు . చెయ్యాలి .   యోగా భారత దేశం ప్రపంచానికిచ్చిన గొప్ప విజ్ఞానం . యిది అందరికంటే మనమే ఎక్కువగా నేర్చుకోవాలి .

అష్టాంగ యోగా అంటే - శరీరాన్ని రకరకాలుగా బంధించే విన్యాసాలు కాదు . యిది మొదట మనకు తెలియాలి. ఆ విన్యాసాల అవసరం పతంజలి  అష్టాంగ  యోగా లో చాలా తక్కువ . దాదాపు అవసరం లేనంత తక్కువ . యోగా అనేది మనసుతో మనం ఆడే ఆట . మనసును  మన అధీనం లో సంతోషంగా వుంచుకునే విజ్ఞానం . ఆ పైన మనసును దాటి, మనలను  గురించి  మనం పూర్తిగా తెలుసుకునే విజ్ఞానం యిది .

ఇదండీ కథ...

సర్వే  జనాః  సుఖినో  భవంతు

వుప్పలధడియం  విజయమోహన్ 

శేషాచలం లో- మానవ హక్కులు - సామూహిక హక్కులు

శేషాచలం లో మానవ హక్కులు 

సామూహిక హక్కులు 

శేషాచలం అడవుల్లో యెర్ర చందనం వృక్షాలను అక్రమం గా కొట్టడమూ , ఆ కలపను అక్రమంగా రవాణా చెయ్యడమూ చాలా కాలం గానే  జరుగుతూ వుంది .   కాంగ్రెస్ ప్రభుత్వం ఉన్నంత కాలం దీన్ని పెద్దగా పట్టించుకోలేదు . ఎందుకు పట్టించుకోలేదో , ఎవరు చెబుతారు ?


యిప్పుడు చంద్రబాబు గారు  ముఖ్య  మంత్రి గా వచ్చారు . తెలంగాణా  విడి పోయిన తర్వాత , రాష్ట్రానికి పెద్దగా  నిధుల కొరత అనే సమస్య కూడా   వచ్చి పడింది.


మొట్టమొదటి నుండి  ముఖ్య మంత్రి గారు, మిగతా మంత్రులూ చెబుతూనే   వున్నారు - వొక్క ఈ యెర్ర చందనం అక్రమ రవాణా  ను నిలిపి ప్రభుత్వ పరంగా దాన్ని అమ్మ గలిగితే , ఆంధ్ర రాష్ట్రం యొక్క ఆర్ధిక సమస్యలు  తీరుతాయని .


 ఎన్నో వేల, లక్షల కోట్ల విలువ గలిగిన ఈ యెర్ర చందనం - స్మగ్లర్ల చేతిలో పడి - ఆంధ్ర  ప్రజల వుమ్మడి సొత్తు , స్మగ్లర్ల సొత్తుగా మారి పోతూ వుంది . యింత విలువ గలిగిన, ఆంధ్ర ప్రజల వుమ్మడి సొత్తు దొంగలు దోచుకు పోతూ  వుంటే , అది ప్రజలందరి మానవ హక్కుల ఉల్లంఘన కాదా ? యిది నిలపడానికి మానవ హక్కుల సంఘాలు ఏం చేశాయి ? ఏం చేస్తున్నాయి ? దీన్ని గురించి వారెవరికీ ఏమీ  పట్టినట్టు లేదు . అయ్యా ! ఈ యెర్ర చందనం చంద్రబాబు సొత్తు కాదు . మీ సొత్తే . అది పోతే , మీ అందరి మానవ హక్కుల ఉల్లంఘన జరిగినట్టే .

వ్యక్తి హక్కులూ ముఖ్యమే . కానీ , సామూహిక హక్కులు అంత కంటే ముఖ్యం . అది పట్టించుకోరా ?


సరే . ప్రజలందరి వుమ్మడి సొత్తు పోతూ వుంటే - ప్రజలేం చేస్తున్నారు ? అదేదో చంద్ర బాబు స్వంత విషయమే గాని తమ విషయం కాదన్నట్టు వున్నారు . మన ప్రజలలో ఈ స్తబ్దత పోవాలి .


సర్వే  జనాః సుఖినో భవంతు


= మీ

వుప్పలధడియం విజయమోహన్

ఉగాది 2015 - మీకు నా శుభాకాంక్షలు , శుభాభినందనలు

ఉగాది -2015

 

ప్రకృతి లో 

మామిడీ , చెరుకూ , వేపా , మిరపా, ఉప్పూ , చింతా - షడ్రుచులకు ప్రతీకలు .   

 అవి కలసిన ఉగాది పచ్చడి 

జీవితంలో 

సంతోషానికి , మాధుర్యానికి , కష్టాలకూ , శోకాలకూ , బాధలకూ , రోగాలకూ , 

నిజానికి నవ రసాలకూ  ప్రతీకగా  నిలుస్తుంది .

అన్నిటినీ 

 స్థిత ప్రజ్ఞత తో స్వీకరించే తెలుగు మనసులకు 

 మన్మథ నామ సంవత్సర ఉగాది నాడు 

నా హార్దిక శుభాకాంక్షలు 

ఈ సంవత్సరంలో -

మీ జీవితాల్లో 

సంతోషం , ఆరోగ్యం 

ప్రేమ , కరుణ 

ఐశ్వర్యం , ఆర్ద్రత 

నిండాలని -

మీ చుట్టూ వున్న వారిలో, మీ పట్ల 

మీ చుట్టూ వున్న వారి పట్ల , మీలో 

 స్నేహం, ప్రేమ పండాలనీ 

 

ఈ సంవత్సరం , మీ జీవితంలో 

ఒక నవ వసంతం కావాలనీ

మీకు నా శుభాకాంక్షలు , శుభాభినందనలు  తెలియజేస్తున్నాను . 

ఈ సంవత్సరంలో 

మనలో ప్రతి వొక్కరూ 

మనకంటే తక్కువ స్థితిలో వున్న 

మరొక్కరి జీవితాన్ని 

ఆదుకోవాలని , వుద్ధరించాలనీ 

ఆశిస్తున్నాను ; ఆ శక్తి , మానసికత మనలో 

అ దేవుడు నింపాలనీ 

ప్రార్థిస్తున్నాను . 

= మీ 

వుప్పలధడియం విజయమోహన్ 

PS :- పతంజలి యోగ సూత్రాల పై వ్యాఖ్యానంగా వొక పుస్తకం రాస్తూ వుండడం వలన  - ఈ మధ్య కాలం లో బ్లాగులో ఎక్కువగా రాయడం జరగలేదు . మరో నెలలోపు అది పూర్తి అయి పోతుందని నా నమ్మకం .  ఆ తరువాత , ఈ బ్లాగులో , మరింత విస్తృతంగా రాయడం జరుగుతుంది

 

 

 

మనం సంతోషంగా వుండి - మరో పది మంది సంతోషానికి కారణమైతే ! - సర్వే జనాః సుఖినో భవంతు

 

బాధ్యత - బాధ్యతా రాహిత్యం 

మీరు లిఫ్టు లో ఏడో అంతస్తు కెళ్ళారు - అక్కడ మీ ఫ్లాటు  వుంది గనుక. పైకి వెళ్ళిన మీరు - లిఫ్టు  తలుపు మూయకపోతే - క్రింది వారు లిఫ్టు కదలక, క్రిందికి పోలేక , పైకి రాలేక - అవస్థ పడతారు . మిమ్మల్ని తిట్టు కుంటారు . లిఫ్టు తలుపులు మూయడం మీ కనీస బాధ్యత.  మీరు చేసిన తప్పే మరొకరు చేస్తే మీరూ తిట్టు కుంటారు కదా . కాబట్టి అది మీ , మన అందరి బాధ్యత . అవునా ! యిది చిన్న విషయం . యిప్పుడు మరో చిన్న విషయం . 

66 ఏళ్ళ స్వాతంత్ర్యం  తరువాత, మోడీ గారు - స్వచ్చ భారత్ ఉద్యమం ఆరంభించారు. భారత దేశం లోని ప్రతి పౌరుడికీ ఇది తన బాధ్యత అని అర్థం చేసుకోవలసిన అవసరం పూర్తిగా వుంది . మన యింట్లో, వీధిలో, వూరిలో, దేశంలో  ప్రతి వొక్కరూ స్వచ్చత , శుభ్రత పాటించాలి . చుట్టూ వున్న వారికీ తెలియ జెప్పాలి . ఇది  చిన్న విషయమే , కానీ యిదే మనం చెయ్యడం లేదు . మరి పెద్ద విషాయాలేం చేస్తాం? ఎప్పుడు చేస్తాం ?

చెయ్యాలనుకునే వారు, చేస్తూ వెడతారు. వారికీ  అడ్డంకులు, కష్టాలు వస్తాయి. కానీ, వాటిని, ఎలాగోలా అధిగమించి, తమ బాధ్యతలను పూర్తి చేస్తారు . 

రిక్షా తొక్కే వాళ్ళు, చెప్పులు కుట్టే వాళ్ళు , కూలీలు ఎంతో మంది తమ కొడుకులు, కూతుర్లను పెద్ద చదువులు చదివించి, పెద్ద ఉద్యోగాల్లో చూడడం, చూసి సంతృప్తి తో మురిసి పోవడం మనం చూస్తూ వున్నాం. అందులో కొంత మంది కొడుకులు,  కూతుర్లు , తమ తల్లిదండ్రులను బాగా చూసుకోవడం  మనకు తెలుసు . 

"మీలో ఎవరు కోటీశ్వరుడు " లో యిటువంటి వారిని మనం అప్పుడప్పుడూ చూస్తూ వున్నాం కదా . మన "నాగార్జున" గారు చాలా చక్కగా నడుపుతూ వున్నారు ఆ ప్రోగ్రామును . 

అయితే, ఎంతో కొంత వున్న వాళ్ళు - పిల్లల భవిష్యత్తును  పూర్తిగా పట్టించుకోక పోవడం , వారిని అప్రయోజకులుగా తయారు చెయ్యడం కూడా  మనం ఎన్నో కుటుంబాలలో చూడొచ్చు . 

నాకు ఈ రెండు  రకాల కుటుంబాలూ  ఎన్నో తెలుసు . 

కొంత మంది పిల్లలు,  పెద్దలు ఎంత చెప్పినా వినక , చదువును , ఆరోగ్యాన్నీ అశ్రద్ధ చేసి , తమ జీవితాలను పాడు చేసుకోవడం నేను చాలానే చూశాను, చూస్తున్నాను . కొంత మంది పెద్దలు రకరకాల వ్యసనాలలొను, అలవాట్లలోను పడి - తమ కుటుంబాన్ని, పిల్లల భవిష్యత్తు ను నాశనం చేసిన , చేస్తున్న కుటుంబాలూ చాలా చూశాను ; చూస్తున్నాను. 

అంటే - బాధ్యతలను నిర్వర్తించే వారు, నిర్లక్ష్యం చేసే వారు - రెండు రకాలూ మనలో వున్నారు. 

మన చుట్టూ వున్న పరిస్థితులను బట్టి, మన బాధ్యతలు మారుతూ వుంటాయి . పరిస్థితులను మనం మార్చలేం .  కానీ,పరిస్థితులకు అనుగుణంగా మనలను మార్చుకునే శక్తి, మన బాధ్యతలను నిర్వర్తించే  శక్తి ఎంతో కొంత దేవుడి మనకు యిచ్చాడు . 

మనకు - తల్లిదండ్రుల పట్ల , పిల్లల పట్ల, సమాజం పట్ల , దేశం పట్ల , అనేక బాధ్యతలు వున్నాయి. కొన్ని నియమాలు , కొన్ని సరిహద్దులూ, కొన్ని అధికారాలూ, కొన్ని హక్కులూ   వున్నాయి . 

ప్రస్తుతం, మన పాఠ శాలల్లో, సమాజం లో మనకు - మన హక్కులు నేర్పుతున్నారే గానీ , బాధ్యతలు  నేర్పడం లేదు. బాధ్యతలు నేర్పని సమాజం - మనం బాధ్యతా యుతంగా ఉంటామని ఎలా అనుకోగలదు. మన సమస్య అదే . 

మన దేశంలో - ముఖ్యంగా, గత 66 ఏళ్ళుగా - హక్కులు , హక్కులు అంటూ ప్రతి వర్గం వారు గోల పెట్టడము , హక్కుల కోసం పోరాడడమే కానీ, ఎవ్వరూ, ఎప్పుడూ తమ తమ బాధ్యతలు ఇవీ అని అనుకోవడం , అవి చెయ్యాలని పూనుకోవడం - చాలా అరుదుగా మాత్రమే కనిపిస్తూ  వుంది .

యిప్పుడు మోడీ గారు స్వచ్ఛ  భారత్ వొక ఉద్యమం లాగా ప్రజల ముందుకు తీసుకు వచ్చారు. యిది మెల్ల మెల్లగా , ప్రజల మనస్సులో నాటుకుంటూ వుంది.  చెప్ప వలసిన వాళ్ళు , చెప్ప వలసిన విధంగా , సున్నితంగా , మనసును తాకే విధంగా చెబితే , చాలా మంది  వొప్పుకుంటారు;  పాటిస్తారు . దాదాపు 80 శాతం మందిని  మంచి మాటలతోనే  మార్చొచ్చు . 

నాయకుడుగా వున్నా వాడు , గాంధీ లాగా , రామకృష్ణ పరమహంస లాగా - తానూ చేసి , యిలా మనం చేద్దాం రండి - అంటే ఎంతో మంది ముందుకు వస్తారు. 

'నేను చెబుతున్నాను - మీరు చెయ్యండి' అంటే - అది ఉద్యమం లాగా వుండదు. ప్రజలు ప్రభావితులు కారు. ముందుకు రారు . ఆ.. మునిసిపాలిటీ  లో, జీతాలు తీసుకుంటున్న వాళ్ళు కదా ఈ పని చెయ్యాలి అనే వాళ్ళు వున్నారు యిప్పుడు కూడా. 66 ఏళ్ళు మరి అలాగే గడిచింది కదా . దేశంలో ఎక్కడ చూసినా కుళ్ళు , కంపూ - తప్ప మరొకటి లేదు . 

చిన్న వుదాహరణ - మీరు కోలకాతా నుండి చెన్నై వస్తున్నారనుకోండి . విజయవాడ ప్రాంతంలో, రాత్రి పడుకున్నారు. నిద్రలో వున్నప్పుడు , ఎక్కడో వొక చోట మహా కంపు కొట్టి, భరించ లేక మీరు లేస్తారు. మీరు పై బెర్తులో వున్నా, చీకట్లో మరేం కనిపించకున్నా , మీకు అర్థమై పోతుంది , చెన్నై దగ్గరికి వచ్చేశామని . ఈ మధ్య కాస్త పరవాలేదు కానీ ముందు చాలా దుర్వాసనగా వుండేది. యిది బాగు చెయ్యాలనుకుంటే , చెయ్యొచ్చు . చెయ్యాలని అనుకోవాలి . 60 ఏళ్ళు అనుకోలేదు . యిప్పుడూ యింకా లేదు . 

గంగ - ఆర్థికంగానూ , సామాజికం గానూ , సాంస్కృతికం గానూ - అన్ని విధాలా మనకు ముఖ్యమైన నది . స్వాతంత్ర్యం  వచ్చే వరకూ బాగానే వుండేది . ఆ తరువాత, మన నిర్లక్ష్యం కారణంగా అన్ని రకాలా కలుష పూరితంగా మారింది.  ఎన్నో దేశాల్లో, ఎన్నో నదులు - స్వచ్చంగా మార్చ బడ్డాయి. మన దేశంలో పాలకులు అనుకోలేదు . అంతే . యిప్పుడు మోడీ గారు అనుకున్నారు; అన్నారు; చాలా మంది చేత అనిపించారు.  యిప్పుడు, చుట్టూ వున్న వారి చేత - ఆ ప్రయత్నాలు తీవ్రతరం  చేయిస్తున్నారు. 

వూడవాలంటే - మొదట మోడీ గారు వూడిచి తరువాత - యిలా చెయ్యండి - అంటారు . అలాగే - గంగ విషయంలో కూడా తన స్వ ప్రయత్నం చేసి , యిక మీరు చెయ్యండి అంటారు . అన్ని విషయాల్లోనూ అంతే. 

యిప్పుడు మరో చిన్న (పెద్ద) విషయం చూద్దాం . మోడీ గారు సరే . కానీ - సంఘ్  పరివార్  లో వున్న VHP,  హిందూ మహాసభ లాంటి వారికి మోడీ గారి చిత్త శుద్ధి , కార్య దీక్ష లేదు . మిగతా మతాల వారు హిందువులను మతం మార్చేస్తున్నారు , మార్చేస్తున్నారు , వీరిని మనం మళ్ళీ మన మతం లోకి తీసుకు రావాలి, ఎలాగోలా - అన్న తపనే గానీ, వున్న వారు ఎందుకు వెళ్లి పోతున్నారు - అన్న ఆలోచన కొంత కూడా లేదు.  ఆ ఎందుకు అన్న విషయం - యిప్పుడు కాస్త చూద్దాం .

మన మత  గురువులలో ఆది శంకరాచార్యుల  వారికి  విశిష్ట స్థానం వుంది అని మనకు తెలుసు .  ఆయన అతి చిన్న వయసులో చెప్పిన నిర్వాణ షట్కం ఎంత గొప్ప  భావాలతో వుంటుందో, చదివితే మనకు చాలా ఆశ్చర్యంగా వుంటుంది . మన సంస్కృతి , మన మతం ఏమిటో - ఆ ఆరు 'శ్లోకాల మాల' అర్థం చేసుకుంటే చాలు; మనకు నిజమైన జ్ఞానం వచ్చేస్తుంది . అందులో ఆయన, నాకు  మృత్యువు కానీ, మృత్యు భయం కానీ , జాతి భేదాలు కానీ లేవుగాక లేవు అన్నారు .  

జాతులే లేవని కాదు - అవి  గుణాన్ని బట్టి , చేసే పని బట్టి అని; జన్మ వలన కాదని శ్రీ కృష్ణుడే  అన్నాడు .  పనిని బట్టి వచ్చిన జాతి భేదాల్ని కూడా నేను చూడ వలసిన అవసరం లేదు - అన్నాడు శంకరుడు . ఆ తరువాత - సాక్షాత్  శివుడే కాశీలో తన్ను అంటరానితనం  పాటిస్తున్నావు సుమా - అని మందలించి, తన తప్పు దిద్దినట్టు, ఆయన చెప్పుకున్నాడు . శంకరులు చెప్పినా, రామానుజులు చెప్పినా - మనం మాత్రం త్వరగా మారడం లేదు . 

ఆ తర్వాత వచ్చిన వారు ఎంతో గొప్ప  వారే అయినా - శంకరులు చెప్పిన ఈ మూల సూత్రాలను, తమ మఠాల్లోనూ , దేవాలయాల్లోనూ పెద్దగా అమలు చెయ్య లేదు . ఇది వారు అనుకుంటే  వొక్క రోజులో మార్చొచ్చు . మారిస్తే, ఏ హిందువూ , మరో మతానికి వెళ్ళ  వలసిన అవసరమే వుండదు . వెళ్ళరు . హైందవ సమాజంలో వున్న ఈ వొక్క విషయం సరి దిద్దుకుంటే , మనం ఎంతో ముందుకు వెళ్ళ వచ్చు. యిది ఎవరు చేస్తారు ? ఎప్పుడు చేస్తారు ? 

మోడీ గారు చేస్తారా ? VHP , RSS , మరెవరైనా చేస్తారా ? మన మఠాధిపతులు చేస్తారా ? మరెవరైనా గురువులు చేస్తారా ? ఎందరో మహానుభావులు ; ఈ మహత్కార్యానికి ముందు నిలిచి ఎవరైనా చెయ్యచ్చు . అందరూ కలిసి చెయ్యొచ్చు .  యిది జరగాలి . గంగ పవిత్ర గంగగా మారుతూ వున్న సమయం లో, యిదీ జరిగి పొతే  ఎంత బాగుంటుంది !

నేను - నా చేత అయ్యే పని ఏదో చేస్తున్నాను . రాముడికి వుడత  చేసిన సహాయం లాగా .  సేవాలయ అనే ఆశ్రమం లో - అనాథ పిల్లలకూ, అనాథలు లాంటి లాంటి వృద్దులకూ - ప్రతి సంవత్సరమూ నేను చెయ్య గలిగినంత ధన సహాయం చేస్తూ వచ్చాను. 2014 నుండి మరో రకంగా చేద్దామని, యిద్దరు పిల్లల చదువు కు - 1 నుండి 12 వ తరగతి వరకు - అయ్యే పూర్తి ఖర్చు నేనే వారికి యిచ్చాను (1.7 లక్షలు ). యిక ముందు కూడా, నా శక్తి వున్న మేరకు, ప్రతి సంవత్సరమూ  వొకరో, ఇద్దరో పిల్లలకు చదువు పూర్తి ఖర్చు యివ్వాలని ఆశ , ఆశయం . దేవుడు ఆశీర్వదిస్తే అంత కంటే ఎక్కువే చేస్తాను . 

ఏదో చిన్న తపన నాలోనూ వుంది - నేను ఎవరి కళ్ళలో సంతోషం నింప గలను; ఎవరి కన్నీళ్లు తుడవగలను - అని . అది నన్ను ముందుకు నడిపిస్తుంది - యిక ముందు కూడా . 

నాకు తెలుసు. మన దేశంలో - ఎంతో మంది  డబ్బు వున్న వారు, ఎంతో, ఎంతో చేస్తున్నారు - విప్రో యజమాని ప్రేమ్జీ లాగా . మరెంతో మంది , ముఖ్యంగా, రాజకీయాల్లో వున్న వారు , అక్రమార్కులు గా ఉన్నారే తప్ప - ఏమీ చెయ్యడం లేదు . సరే . వారిని వదిలి పెట్టి , మనం అనుకుంటే, మనం చెయ్య గలిగింది చేస్తే ,  ఎంతో కొంత దేశం బాగు పడుతుంది కదా . 

ఇదొక్కటే కాదు . మనం మరెన్నో చెయ్యొచ్చు . నేను చేస్తున్న మరి కొన్ని పనులు మరో సారి మీతో పంచుకుంటా . 


మనం సంపాదించేదేదీ మన వెనుక రాదు ; మనం యిచ్చేదే  మనతో వస్తుందని , ఉపనిషత్తులు, గీత అన్నీ ఘోషిస్తున్నాయి .

మనం సంతోషంగా వుండి , మరో పది మంది సంతోషానికి కారణమైతే - అదే మన సంస్కృతి ఆశయం, లక్ష్యం. మన జీవన సాఫల్యం కూడా అందులోనే వుంది. 

సర్వే జనాః సుఖినో భవంతు అంటే అదే. మన బాధ్యతా నిర్వహణ అంటే కూడా అదే కదా .  

సరే . మీ అభిప్రాయాలు, సలహాలు తప్పకుండా చెప్పండి . సంతోషంగా స్వీకరిస్తాను . 

సర్వే జనాః సుఖినో భవంతు

= మీ 

వుప్పలధడియం విజయమోహన్ 

మేము యిప్పటికి చదివిస్తున్న యిద్దరు పిల్లలు

ఏ రోగమయినా నయం అవుతుంది - ఎలా ? - మీరేం చెయ్యాలి? - డాక్టర్లు ఏం చెయ్యాలి ?

వ్యాధులూ - మనమూ

మన దేశం లో - రక రకాల రోగాలు చాలా పెరిగి పోతున్నాయి .

కొన్ని దీర్ఘ కాలిక రోగాలు . కొన్ని మందుల్లేని రోగాలు . కొన్ని మరణం తప్పదనిపించే రోగాలు . కొన్ని  మందులతో నయమయ్యే రోగాలు . కొన్ని సర్జరీ అవసరమైనవి . కొన్ని సర్జరీ  అవసరం లేనివి .  యిలా రోగాలు ఎన్ని రకాలో . ఎన్నెన్ని రకాలో . 

పుట్టిన బిడ్డ నుండి ,  వంద ఏళ్ళ వారి వరకు  అందరికీ రోగాలే .


ఎయిడ్స్ పెద్ద రోగం  అనుకుంటే , కాదు నేనున్నాను అంటూ - ఎబోలా వస్తూ వుంది . కాన్సర్ అంటే పెద్ద భయం యిప్పటికీ అందరికీ వుంది. చర్మ రోగాలు ప్రమాద కరం కాకున్నా, చాలా వాటికి సరైన మందులు లేవు . పిచ్చికుక్క కాటుకు కూడా యిప్పటికీ సరైన వైద్యం లేదు . కరిచిన ఘంట లోగా ఇంజక్షన్లు వేసుకుంటే చాలా మంచిది  .  మనకు వచ్చే మానసిక రోగాలూ ఎన్నో, ఎన్నెన్నో . వాటికీ సరైన వైద్యాలు లేవు .
యిలా వుంటే ఎలా ?

"రాకుండా చూసుకోవడం "  ,  "నయం చేసుకోవడం" కంటే ఎంతో మేలు ; ఎంతో సులభం - అన్న నానుడి వుండనే వుంది .  అది నిజమే .  కాకుంటే - రాకుండా చూసుకోవడం ఎలా ? అది తెలిసి చావాలి కదా . ఏ రోగమూ రాకుండా ఎలా చూసుకోవడం ?

యేవో కొన్ని ముందు జాగ్రత్తలు చేసుకోవచ్చు . చేసుకుంటే కొంత మేలు .

ఏం చేసుకోవచ్చు ?

(1) దోమలు, ఈగలు , బొద్దింకలు లాంటి రోగవాహక , క్రిమి వాహక జీవులు  - యిళ్ళలో , యిళ్ళ దగ్గర లేకుండా జాగ్రత్త పడ వచ్చు . ముఖ్యంగా మురుగు నీరు వుండకూడదు . అక్కడే రోగవాహక , క్రిమి వాహక జీవులు పెరుగుతాయి .

(2) ఆహారము, విహారము , చేసే పనులు, నిద్ర, మేలుకునే సమయం - అన్నీ, మితంగా , మనకు తగినవిగా వుండాలన్నాడు - గీతలో శ్రీ కృష్ణుడు. నేను ఫాస్ట్ ఫుడ్స్  తింటాను . ఎంత  సేపైనా నిద్ర పోతాను; ఎంత సేపైనా మేలుకుంటాను . శరీర వ్యాయామం అసలు చేయను .  లేదా,దినమంతా వ్యాయామం చేస్తాను - యిలా ఏదైనా సరే , 'అమితం' గా చేసే వారికి ఆరోగ్యమూ వుండదు . సంతోషమూ వుండదు .

(3) యింట్లో - చెత్త , దుమ్ము - లాంటివి లేకుండా చూసుకుంటే ఆరోగ్యానికి చాలా మంచిది .

(3) ఇలాగే , మానసిక ప్రవృత్తులు కూడా కొన్ని నియమిత పరిధులలో వుంటే - ఆరోగ్యమూ వుంటుంది ; ఆనందమూ వుంటుంది .  మితి మీరిన పోకడలు పొతే , మానసిక ఆరోగ్యము చెడుతుంది ; తన కోపమె తన శత్రువు , తన శాంతమె తనకు రక్ష , దయ చుట్టంబౌ , తన సంతోషమే స్వర్గము , తన దుఃఖమే నరకమండ్రు  తథ్యము సుమతీ ! అన్నది పెద్దల సలహా . యిది వెయ్యేళ్ళు  పోయినా - మన మానసిక ఆరోగ్యానికి సూత్రం గా నిలబడుతుంది . నోరు నెమ్మదైతే , వూరు నెమ్మదౌతుంది.  యిదీ పెద్దలు చెప్పినదే, వేల సంవత్సరాల అనుభవానికి యివి ప్రతీకలు , ఫలితాలు . వీటిని పాటించక పొతే - మనకే నష్టం . నేను నిష్కర్ష గా మాట్లాడుతాను - అనే వారెవ్వరూ , ఎదుటి వారు తమ గురించి నిష్కర్ష గా మాట్లాడితే  విన లేరు . నిజాలు కూడా , చెప్పాల్సిన విధం వుంది . అది నేర్చుకోవాలి . వీటి వల్ల ఆరోగ్యం ఎలా వస్తుంది ? తప్పకుండా వస్తుంది . ప్రశాంతం గా, సంతోషంగా వుండే వారికి, రోగాలు రావడం చాలా తక్కువ . వచ్చినా - త్వరగా తగ్గిపోతాయి . యిది, నా, మన, అందరి  జీవితానుభవమే కదా !

రోగాలు రాకుండా చేసుకోవడానికి యిలా ఎన్నో మౌలిక సూత్రాలు వున్నాయి . ఇవి మనం  పాటించాలి .

సరే . రోగాలు వచ్చేశాయి . యిప్పుడేం  చెయ్యడం ?

ఉదాహరణకు - ఎవరికో కాన్సర్ వచ్చిందనుకోండి . చుట్టూ వున్న వాళ్ళు ఏం చెయ్యాలి ? కాన్సర్ వచ్చిన వాళ్ళు ఏం చెయ్యాలి ? డాక్టర్లు ఏం చెయ్యాలి ?

ఇలాంటి రోగాల్లో - రోగం సగం . భయం సగం గా వుంటుంది . నిజానికి భయం , వైద్యం పైన అపనమ్మకం అనే 2 అంశాలు - రోగానికంటే  ఎక్కువగా రోగిని బాధ పెడుతూ వుంటుంది . మొదట యివి పోవాలి . డాక్టర్లు మొట్ట మొదట ఇవ్వాల్సింది  నమ్మకం , ధైర్యం . ఎంతో మంది డాక్టర్లు , చాలా రోగాల్లో - యివి యివ్వడం లేదు.  మేం చేసేదంతా చేస్తాం ; ఆపై దేవుడి దయ ; మీ అదృష్టం - లాంటి మాటలు అంటూ వుంటారు . యిది చాలా తప్పు .

డాక్టర్లు నమ్మకం యివ్వాలి . ధైర్యం యివ్వాలి . అదే వారిచ్చే గొప్ప ఔషధం . దేవుడి దయ, అదృష్టం ఎలా వుంటాయో  ఎవరికీ తెలీదు. రోగికి ముందు డాక్టరే పోవచ్చు . లేదా రోగి పోవచ్చు . మనకు తెలీని ఇలాంటి విషయాల గురించి కాదు . డాక్టర్ తను చేసే వైద్యం లో ప్ర ప్రథమం గా నమ్మకం , ధైర్యం యివ్వడం వుండాలి . నిజమైన పరిస్థితి చుట్టాలకు  చెప్ప వచ్చు . కానీ , రోగికి మాత్రం నమ్మకం , ధైర్యం కలిగించాలి . నా వుద్దేశంలో - డాక్టర్లు చెయ్య గలిగిన, చెయ్య వలసిన మొదటి వైద్యం యిదే .

నా అనుభవమే చెబుతాను . 5 ఏళ్ళ క్రితం నన్ను వొక పిచ్చి కుక్క వెనుక నుండి  వచ్చి కాలిపైన కొరికింది . అది పిచ్చి కుక్క అన్నది వెంటనే తెలిసిపోయింది కూడా . ఎందు కంటే , నన్ను కొరికి పరుగెత్తుకెళ్ళి , మరెంత మందినో కొరికింది. నేను వెంటనే నాకు బాగా తెలిసిన వొక డాక్టరు ఫ్రెండు కు ఫోన్ చేసి విషయం చెప్పి ఏం చెయ్యాలని అడిగాను . ఆమె చెప్పినట్టు - కొరికిన భాగాన్ని బాగా టాప్ క్రింద కడిగి (డెటాల్ తో కూడా) వెంటనే, వొక లోకల్ డాక్టర్ దగ్గరి కెళ్లి  ఆంటి రాబీస్ ఇంజక్షన్లు  వేయించుకున్నాను . ఆయన చెప్పినట్టు  చెప్పిన రోజుల్లో వెళ్లి మిగతా అన్ని యింజక్షన్ లూ  వేయించుకున్నాను. 

కానీ - నేను యిక ప్రమాదమేమీ లేదు కదా  - అని ఆయన్ను  అడిగితే, దాదాపు 3-4 నిముషాలు మౌనంగా వుండి , ఆ తరువాత , మిమ్మల్నిఆర్నెల్లలోగా మరో పిచ్చి కుక్క కొరికితే నేను వేసిన యివే ఇంజక్షన్లు పని చేస్తాయి - అన్నాడు . నేను అది సరే , మరో పిచ్చి కుక్క కరవడం అటుంచండి ; ఈ పిచ్చి కుక్క కాటుకు , మీరు చేసిన వైద్యం తరువాత  నాకు మరేమీ  ప్రమాదం లేదు కదా  - అని అడిగితే , మళ్ళీ అదే తంతు . కాస్సేపు మౌనం , మళ్ళీ, మరో పిచ్చి కుక్క కరవడం గురించే మాట్లాడుతున్నారాయన . ఇప్పటికే కరిచిన పిచ్చి కుక్కను గురించి మాట్లాడడం లేదు ఆయన . యిక లాభం లేదని , మరో ముగ్గురు  లోకల్ డాక్టర్ల  దగ్గరకెళ్ళి అడిగితే , అక్కడా యిదే తంతు . ఎందుకిలా ? ఆ తరువాత నేను ఇంటర్నెట్ లో చూశాను . అక్కడా సరిగ్గా యిదే పదాలు రాసుంది . యిదే చెబుతున్నారు ఆ డాక్టర్లు . ఆ తరువాత - దూరంలో వున్న నా ఫ్రెండు డాక్టరును అడిగాను . ఆమె చెప్పిన జవాబు నాకు సంతోషం కలిగించింది , ఆమె - "అన్నా! నేను  వారానికి కనీసం పది మందికి యివే ఇంజక్షన్లు వేస్తూనే వున్నాను . నేను పని చేస్తున్న చోట యిది మామూలు . యిప్పటికి కొన్ని వందల , వేల మందికి వేశాను . అందరూ బాగానే  వున్నారు . ఏ వొక్కరూ పోలేదు .  సరైన సమయానికి ఇంజక్షన్లు వేసుకుంటే  చాలు ; ఏ ప్రమాదమూ లేదు . మీరు యిక ఆ విషయం పూర్తిగా మరిచిపొండి . హాయిగా వుండండి . మీకు ఏ ప్రమాదమూ లేదు." అనింది .

ఈ మాటలు మిగతా వారు ఎందుకు చెప్పటం  లేదు?  వారు చేసే వైద్యం తరువాత కూడా , వొక్క శాతం కేసులు , లేదా 0. 1  శాతం కేసులు ఫెయిల్ అవ్వొచ్చు . కానీ , అడిగే పేషంటుకు ధైర్యం చెబితే ఏం పోతుంది. నా ఉద్దేశంలో వున్న వైద్యం చేసి, డాక్టరు పూర్తి ధైర్యం, నమ్మకం  యివ్వాలి . 0. 1  శాతం కేసులు ఏ రోగం లో అయినా ఫెయిల్ అవ్వొచ్చు . డాక్టర్ ధైర్యం , నమ్మకం యివ్వక పొతే , 0. 1 శాతం పదింతలు పెరిగే అవకాశం వుంది.   కుక్క కాటుకు పోకున్నా , మానసిక  అధైర్యం తో పొయ్యే అవకాశం వుంది .

కాన్సరైనా  అంతే . డాక్టర్లు పూర్తి ధైర్యం, నమ్మకం యివ్వాలి రోగికి . కాన్సర్ పూర్తిగా తగ్గి ఎన్నో దశాబ్దాలు ఆరోగ్యంగా వున్న వారు ఎంతో మంది వున్నారు..  చాలా మంది డాక్టర్లు , తగ్గొచ్చు , తగ్గక పోవచ్చు అన్న  విధంగా   మాట్లాడుతూ వుండడం  నేను చూశాను . రోగుల విషయంలో వారు - అంత సత్య హరిశ్చంద్రులుగా వుండడం చాలా తప్పు . సంస్కృతంలో  సత్యం గురించి గొప్ప నీతి వుంది . "సత్యం బ్రూయాత్ , ప్రియం బ్రూయాత్ , న బ్రూయాత్ సత్యమప్రియం ."  అంటే -  సత్యాన్ని చెప్పండి . ప్రియంగా వుండేటట్టు చెప్పండి . అప్రియంగా వుండేలా ఎలాంటి సత్యమూ చెప్పకండి .   యిలా ఎన్నో వున్నాయి . మీరు చెప్పే అబద్ధం వలన లోక హితం జరుగుతుందంటే - ఆ అబద్ధమే నిజం . ప్రకృతి కూడా , మీరు చెప్పింది , లోక హితం కోసం  అంటే , దాన్ని నిజం చెయ్యడానికి కృషి చేస్తుంది.

రోగి తనకు నయమవుతుందని నమ్మితే - అతని శరీరము , మనసు, అది నిజం చెయ్యడానికి పూర్తిగా సహకరిస్తాయి . ఆ నమ్మకం అబద్ధం కాదు . కానీ , తనకు నయం కాదని అతడు నమ్మితే , అది నిజమయ్యే ప్రమాదం చాలా వుంది - ఎంత మంచి మందులు యిచ్చినా . అందుకని డాక్టర్లు, రోగి యొక్క కుటుంబ సభ్యులు, అందరూ ,  అతనికి ఆ నమ్మకం పూర్తిగా కలిగించాలి .

నమ్మకం మొట్ట మొదటిదైనా - రోగం పోవడానికి , మందులూ తీసుకోవాలి . నా ఉద్దేశం లో - అల్లోపతి , ఆయుర్వేద - రెండూ బాగా పనిచేస్తాయి , చాలా రోగాలకు . అలాగే - హోమియోపతి వైద్యం కూడా చాలా బాగా పనిచేస్తుంది ఎన్నో రోగాలకు . కానీ సర్జరీ కావాల్సిన చోట ,  కేమోథెరపీ కావాల్సిన చోట , యిలా మరి కొన్ని అధునాతన వైద్యాలకు - అలోపతీ వాడి తీరాల్సిందే . అయితే , యివి వాడుతున్నప్పుడు కూడా - ఎన్నో రకాల ఆయుర్వేద మందులు కూడా వాడవచ్చు . వుదాహరణకు - కాన్సరు పేషంట్లు ,  వీట్ గ్రాస్ జూస్  కానీ  వీట్ గ్రాస్ పౌడర్ కానీ వాడటం, వాటి వుపయోగం చాలా వుండడం నేను చూశాను .

అలాగే , హృద్రోగాలు రాకుండా వుండటానికి , వచ్చినవి ఎక్కువ కాకుండా వుండటానికి - అర్జున మాత్రలు, బాగా ఉపయోగ పడడం నేను చూశాను . బ్లడ్ ప్రెషర్ కు బాబా రామ్ దేవ్ గారి ముక్తావటి మాత్రలు బాగా ఉపయోగ పడటం - పూర్తిగా నయమవడం - నా ప్రత్యక్ష  అనుభవం . యిలా ఎన్నో రోగాలకు , అల్లోపతీ లో సరైన వైద్యం లేని రోగాలకు - ఆయుర్వేదం లో మంచి మందులున్నాయి .  కానీ, కొన్ని రోగాలకు అల్లోపతీ లోనే సరైన వైద్యం వుంది . రోగి - యివి రెండూ వాడితే - చాలా రోగాలు , చాలా త్వరగా నయమవడం నేను చూశాను . కానీ, అల్లోపతీ వైద్యులు యిది వొప్పుకోరు . కానీ, వారికే  యిటువంటి వ్యాధులు వచ్చినప్పుడు , ఆయుర్వేద మందులు వాడడం అన్ని దేశాల్లో జరుగుతూ వుంది . అది తమకు సత్ఫలితాలను యిచ్చినట్టు ఆ అల్లోపతీ వైద్యులు పుస్తకాలు కూడా రాశారు . యిది ఇంటర్నెట్ లో ఎంతో మంది అల్లోపతీ వైద్యులే రాయడం , చెప్పడం - మనం చూడొచ్చు.

ఆయుర్వేద వైద్య పధ్ధతి లో - రోగాలు రాకుండా చేసే వైద్య విధానాలు చాలా వున్నాయి . యివి మనం తెలుసుకోవాలి , పాటించాలి .

ప్రతి దినం  ఉదయం , రాత్రి - 15 నిముషాలు (కనీసం) యోగాసనాలు, ధ్యానం  చేస్తే - శారీరక , మానసిక ఆరోగ్యాలకు రెండింటికీ చాలా మంచిది. 

ధ్యానం ద్వారా  - ఏదైనా సాధించ వచ్చని  పతంజలి నొక్కి చెప్పారు . దురదృష్ట వశాత్తూ, ఈ రోజు - యోగా, ధ్యానం వీటిపైన అమెరికా లో వున్న నమ్మకం , మన దేశం లో లేకపోయింది . అక్కడ యోగా, ధ్యానం చేసే వారి సంఖ్య మన దేశం లో కంటే  చాలా ఎక్కువ .

మన టీవీ  చానెళ్ళలో - వీటిని గురించి ఏమీ తెలియకున్నా , హేళన గా మాట్లాడే మూర్ఖుల సంఖ్య  ఎక్కువగా వుంది . వారు చెప్పే దానికి తగినట్టు , వారికంటే  మూర్ఖులైన  దొంగ  స్వాములు , వారిని నమ్మే  అమాయక ప్రజలు కూడా ఎక్కువగానే  వున్నారు .

యోగా అన్నది మన దేశంలో వున్న అతి  గొప్ప సైన్స్ . అందులో  ధ్యానం అన్నది గొప్ప అంతర్భాగం . వీటి వుపయోగాలు అనంతం - అంటే ఏమీ అతిశయోక్తి కాదు .

నా అభిప్రాయంలో - మన దేశంలో  - డాక్టర్లు , రాజకీయ నాయకులు , మీడియా ప్రముఖులు - వీరికి మొట్ట మొదట - యోగా, ధ్యానం - వీటిలో శిక్షణ యివ్వాలి . డాక్టర్లు చాలా మంది నేర్చుకుంటూ వున్నారు . రాజకీయ నాయకులు , మీడియా ప్రముఖులు - వీరితోనే వచ్చిన చిక్కల్లా .  తమకు ఏ మాత్రమూ అనుభవం లేని ఈ విషయాల గురించి ఎంతో హేళనగా మాట్లాడుతూ వుంటారు . వారు యివి నేర్చుకుంటే - వారూ బాగు పడతారు ; దేశమూ బాగు పడుతుంది .

మీరు చెయ్య గలిగిన, చెయ్య వలసిన  విషయం వొకటి వుంది .

ప్రతి దినం - కనీసం 15 నిమిషాలు -   ధ్యానం చెయ్యండి . ఏ చిన్న, పెద్ద రోగం వున్నా , మీ ధ్యానం వల్ల , మీలో వున్న అపరిమిత నమ్మకం వల్ల , మీ రోగాలన్నీ పోతున్నట్టు , మీరు సంపూర్ణ ఆరోగ్య వంతులౌతున్నట్టు - నమ్మకం తో ధ్యానం చెయ్యండి .  మీ నమ్మకం నిజమౌతుంది. యిది - నా అనుభవం . నా చుట్టూ వున్న వారి అనుభవం . నాకు తెలిసిన ఎంతో మంది అనుభవం . అదే మీ అనుభవం అవుతుంది .

సర్వే జనాః సుఖినో భవంతు .

=  మీ

వుప్పలధడియం విజయమోహన్